મહીસાગર જિલ્લાના લુણાવાડા પંથકમાં 'લૂંટેરી દુલ્હન'નો વધુ એક કિસ્સો પ્રકાશમાં આવતા ચકચાર મચી ગઈ છે. લુણાવાડાના એક યુવકે મોટી આશાઓ સાથે એક યુવતી સાથે લગ્ન કર્યા હતા. લગ્નના શરૂઆતના ૧૦ દિવસ સુધી બધું સામાન્ય જણાતું હતું અને યુવતી પતિના ઘરે હળીમળીને રહી હતી. જોકે, દસ દિવસ પૂર્ણ થતાની સાથે જ આ નવવધૂ અસલી મકસદ પાર પાડીને અચાનક ગાયબ થઈ ગઈ હતી. સવારે જ્યારે પરિવાર જાગ્યો ત્યારે યુવતી ઘરમાં નહોતી અને તપાસ કરતા માલૂમ પડ્યું કે તે ઘરમાં રાખેલા લાખોના દાગીના પણ પોતાની સાથે લઈ ગઈ છે.
લગ્નનો શોખ મોંઘો પડ્યો
પીડિત યુવકના જણાવ્યા અનુસાર, આ લૂંટેરી દુલ્હન ઘરમાંથી અંદાજે ૨.૫૦ લાખની રોકડ રકમ અને સોના-ચાંદીના કિંમતી દાગીના લઈને ફરાર થઈ ગઈ છે. લગ્નના નામે છેતરપિંડી થઈ હોવાનું સમજાતા જ યુવક અને તેના પરિવારે લુણાવાડા પોલીસ મથકનો સંપર્ક સાધ્યો હતો. પોલીસે આ મામલે છેતરપિંડીનો ગુનો નોંધીને યુવતી અને આ લગ્ન કરાવનારા મધ્યસ્થીઓની શોધખોળ શરૂ કરી છે. આ ઘટનાને પગલે સમગ્ર પંથકમાં ચર્ચા જાગી છે કે લગ્ન નક્કી કરતા પહેલા યુવતીના પરિવાર અને બેકગ્રાઉન્ડની તપાસ કરવી કેટલી અનિવાર્ય છે.