મહેસાણા મહાનગરપાલિકા દ્વારા શહેરના વિકાસ માટે લેવામાં આવતા નિર્ણયો ઘણીવાર વિવાદનું કેન્દ્ર બનતા હોય છે. તાજેતરમાં ગાંધીનગર લિંક રોડ પર બની રહેલા ગટરના પમ્પિંગ સ્ટેશને સ્થાનિક રહીશોમાં રોષની જ્વાળા ભડકાવી દીધી છે. વિવાદનું મુખ્ય કારણ એ છે કે, જે જગ્યાએ પીવાના પાણીનો મુખ્ય 'સંપ' આવેલો છે, તેની બિલકુલ બાજુમાં જ મનપા દ્વારા ગટરનું પમ્પિંગ સ્ટેશન બનાવવાનું કામ શરૂ કરવામાં આવ્યું છે.
પીવાના પાણી અને ગટરના પાણી એક સાથે થવાની શક્યતા
લોકોનો ડર અને આરોપ સ્થાનિકોનો આક્ષેપ છે કે પીવાના પાણીના સ્ત્રોત અને ગટરનું સ્ટેશન એકબીજાની અડીને હોવાથી ભવિષ્યમાં ગટરનું દૂષિત પાણી પીવાના પાણીમાં ભળવાની પૂરેપૂરી શક્યતા છે. જો કોઈ લીકેજ થાય અથવા ટેકનિકલ ખામી સર્જાય, તો હજારો લોકોના સ્વાસ્થ્ય સામે ગંભીર ખતરો ઊભો થઈ શકે છે. રોગચાળો ફાટી નીકળવાની ભીતિ વચ્ચે રહીશોએ વારંવાર રજૂઆતો કરી હોવા છતાં તંત્ર દ્વારા કામગીરી ચાલુ રાખવામાં આવતા મામલો બિચક્યો છે.
