મહેસાણા જિલ્લામાં ONGC ની સંપત્તિ પર તરાપ મારતું વધુ એક ઓઈલ ચોરીનું કૌભાંડ પ્રકાશમાં આવ્યું છે. જોટાણા તાલુકાના માંકણજ ગામે સાંથલ પોલીસે દરોડા પાડીને ટેન્કરમાંથી ક્રૂડ ઓઈલની ચોરી કરતા એક શખ્સને ઝડપી લીધો છે, જ્યારે મુખ્ય આરોપી ટેન્કર ડ્રાઈવર સહિત ત્રણ શખ્સો ફરાર થઈ ગયા છે.
મહેસાણામાં ઓઈલ ચોરીનું કૌભાંડ
મહેસાણા જિલ્લા પોલીસ વડાની સૂચના હેઠળ કડી ડિવિઝન માર્ગદર્શનમાં સાંથલ પોલીસની ટીમ પેટ્રોલિંગમાં હતી. આ દરમિયાન ચોક્કસ બાતમી મળી હતી કે, માંકણજ ગામનો શૈલેષસિંહ ઉર્ફે શલુભા ઝાલા, જે પોતે ONGC ના ટેન્કર પર ડ્રાઈવર તરીકે ફરજ બજાવે છે, તે પોતાના ઘર પાસે ટેન્કર ઊભું રાખીને તેમાંથી ઓઈલની ચોરી કરી રહ્યો છે. બાતમીના આધારે પોલીસે માંકણજ ગામે ખેતર પાસેના મકાન પર દરોડા પાડ્યા ત્યારે સ્થળ પર ONGC નું ઓફિશિયલ ટેન્કર અને એક ખાનગી ટ્રક મળી આવ્યા હતા. આરોપીઓ પાઈપલાઈન વાટે ટેન્કરમાંથી ક્રૂડ ઓઈલ કાઢીને ખાનગી ટ્રકની ટાંકીમાં ભરી રહ્યા હતા.
