વર્ષ 2021માં મોરબીના વિસીપરા વિસ્તારમાં થયેલા ચકચારી ડબલ મર્ડર કેસમાં મોરબી ડિસ્ટ્રિક્ટ એન્ડ સેસન્સ કોર્ટે આજે મહત્વનો ચુકાદો આપ્યો છે. નગરપાલિકાની ચૂંટણીની અદાવતમાં પિતા-પુત્રની હત્યા કરનાર ચારેય શખ્સોને કોર્ટે આજીવન કેદની સજા અને પ્રત્યેકને રૂપિયા 30 હજારનો દંડ ફટકાર્યો છે.
મોરબીમાં વર્ષ 2021માં ડબલ મર્ડરનો કેસ
ઘટના વર્ષ 2021ની છે, જ્યારે મોરબી નગરપાલિકાના પૂર્વ ઉપપ્રમુખ ફારૂકભાઈ ઈબ્રાહીમભાઈ મોટલાણી અને તેમના પુત્ર ઈમ્તિયાઝ મોટલાણી પર જૂની રાજકીય અદાવત રાખી જીવલેણ હુમલો કરવામાં આવ્યો હતો. નગરપાલિકાની ચૂંટણીના ખારમાં આરોપીઓએ પૂર્વ આયોજિત કાવતરું ઘડીને પિતા-પુત્ર પર છરી અને ઘારીયા જેવા ઘાતક હથિયારો વડે હુમલો કર્યો હતો. આ હુમલામાં ગંભીર ઈજાઓ થવાના કારણે બંનેનું કરુણ મોત નીપજ્યું હતું.
