નવસારી જિલ્લાના સાદકપોર ગામે મોડી રાત્રે એક દીપડો અકસ્માતે કૂવામાં ખાબક્યો હતો. જોકે, આ અંગેની જાણ થતાં જ વન વિભાગની ટીમે તાત્કાલિક ઘટનાસ્થળે પહોંચીને યુદ્ધના ધોરણે ઓપરેશન હાથ ધર્યું હતું અને દીપડાનું સફળતાપૂર્વક રેસ્ક્યૂ કર્યું હતું.
નવસારીમાં કૂવામાં ખાબકેલા દીપડાનું રેસ્ક્યુ
પ્રાપ્ત વિગતો અનુસાર, નવસારીના સાદકપોર ગામમાં મોડી રાતના સમયે એક દીપડો ભૂલથી અથવા શિકારની શોધમાં ફરતા કૂવામાં પડી ગયો હતો. દીપડાના કૂવામાં પડવાની જાણ થતાં જ ગ્રામજનોએ તાત્કાલિક વન વિભાગને જાણ કરી હતી.વન વિભાગની ટીમ તરત જ જરૂરી સાધનો સાથે સ્થળ પર પહોંચી ગઈ હતી. મોડી રાત હોવા છતાં, ટીમે દીપડાને બહાર કાઢવા માટે જટિલ રેસ્ક્યૂ ઓપરેશન શરૂ કર્યું હતું. ટીમે કૂવામાં પાંજરું નીચે ઉતાર્યું હતું અને ખૂબ જ સાવધાનીપૂર્વક દીપડાને પાંજરામાં પૂરી દીધો હતો. ત્યારબાદ દોરડાની મદદથી દીપડા સાથેના પાંજરાને સલામત રીતે કૂવામાંથી બહાર કાઢવામાં આવ્યું હતું.
