બનાસકાંઠાના પાલનપુર તાલુકામાં વીરપુર નજીકથી મળી આવેલા યુવકના મૃતદેહ મામલે મોટો ખુલાસો થયો છે. મૃતક યુવક રવિ માળીએ સાસરિયા પક્ષના ત્રાસથી કંટાળીને આત્મહત્યા કરી હોવાનું સામે આવ્યું છે. આ મામલે પાલનપુર તાલુકા પોલીસે મૃતકના સાસરિયા પક્ષના 5 સભ્યો વિરુદ્ધ આપઘાત માટે દુષ્પ્રેરણા આપવાનો ગુનો નોંધી કાયદેસરની કાર્યવાહી હાથ ધરી છે.
આપઘાત પહેલા વિડિયો બનાવી આક્ષેપ કર્યા
ઘટનાની વિગત મુજબ, રવિ માળીએ આત્મહત્યાનું અંતિમ પગલું ભરતા પહેલા એક વિડિયો બનાવ્યો હતો. આ વિડિયોમાં તેણે સાસરિયા પક્ષ દ્વારા તેને આપવામાં આવતા માનસિક ત્રાસની આપવીતી વર્ણવી હતી. રવિએ આક્ષેપ કર્યો હતો કે તેના સાસરિયાઓ તેને સતત પરેશાન કરી રહ્યા છે, જેના કારણે તે આ અત્યંત આઘાતજનક પગલું ભરી રહ્યો છે. આ વિડિયો પુરાવા તરીકે સામે આવતા પોલીસે ગુનો નોંધવાની પ્રક્રિયા તેજ કરી હતી.