પાટણ શહેરમાં આજે દિવસે-દહાડે ફાયરિંગની ઘટના બનતા ભારે ચકચાર મચી ગઈ છે. શહેરના વ્યસ્ત ગણાતા નીલમ સિનેમા વિસ્તારમાં બે જૂથો વચ્ચે જૂની અદાવતને લઈને અથડામણ થઈ હતી, જેમાં એક યુવક પર ગોળી ચલાવવામાં આવતા તે ગંભીર રીતે ઈજાગ્રસ્ત થયો છે.
ભરબજારમાં ફાયરિંગથી અફરાતફરી
પ્રાપ્ત વિગતો મુજબ, પાટણના નીલમ સિનેમા વિસ્તારમાં આજે બપોરે એકાએક બે જૂથો આમને-સામને આવી ગયા હતા. બંને જૂથો વચ્ચે ચાલતી જૂની અદાવતનું પરિણામ આજે ફાયરિંગમાં આવ્યું હતું. અજાણ્યા શખ્સો દ્વારા ચલાવવામાં આવેલી ગોળી સીધી એક યુવકને વાગતા તે લોહીલુહાણ હાલતમાં રસ્તા પર ઢળી પડ્યો હતો. બનાવને પગલે વિસ્તારમાં અફરાતફરી મચી ગઈ હતી અને લોકો જીવ બચાવવા દોડતા થયા હતા.
