પાટણ જિલ્લાના રાધનપુર શહેરમાં આવેલી 'માજીસા મોબાઈલ' નામની દુકાનમાં થયેલી મોટી ચોરીનો ભેદ ઉકેલવામાં પાટણ એલ.સી.બી. (LCB) ટીમને મોટી સફળતા મળી છે. ગત 28 માર્ચના રોજ રાત્રિના સમયે દુકાનનું શટર તોડી ૫૫ જેટલા મોબાઈલની ચોરી કરનાર આંતર જિલ્લા ટોળકીના 4 સાગરીતોને પોલીસે ગણતરીના દિવસોમાં જ મુદ્દામાલ સાથે દબોચી લીધા છે.
માજીસા મોબાઇલ દુકાનમાં થઇ હતી ચોરી
ચોરીની આ ઘટના બાદ પાટણ એલ.સી.બી.ની ટીમે સીસીટીવી ફૂટેજ અને ટેકનિકલ એનાલિસીસના આધારે તપાસનો ધમધમાટ શરૂ કર્યો હતો. પોલીસને મળેલી બાતમીના આધારે વોચ ગોઠવીને 4 આરોપીઓની ધરપકડ કરવામાં આવી છે. પકડાયેલા આરોપીઓ પાસેથી ચોરી કરેલા 30 મોબાઈલ ફોન અને ચોરીમાં વપરાયેલ પલ્સર બાઈક સહિત કુલ રૂ. 3,44,000નો મુદ્દામાલ જપ્ત કરવામાં આવ્યો છે.
