પાટણ શહેરના હાર્દ સમાન તાલુકા પંચાયત કચેરી પાસે રવિવારે એક ખાનગી કારમાં અચાનક આગ લાગતા અફરાતફરીનો માહોલ સર્જાયો હતો. ધુમાડાના ગોટેગોટા હવામાં ઉંચે ઉડતા જોઈ લોકોમાં ભય વ્યાપી ગયો હતો. જોકે, પાટણ નગરપાલિકાના ફાયર ફાઈટરોએ સમયસૂચકતા વાપરી આગ પર કાબૂ મેળવતા મોટી જાનહાનિ ટળી હતી.
પાર્ક કરેલી કાર બની આગનો ગોળો
રવિવારની રજા હોવા છતાં તાલુકા પંચાયત કચેરીનો વિસ્તાર સતત અવરજવરથી ધમધમતો હોય છે. અહીં કમ્પાઉન્ડ પાસે પાર્ક કરેલી એક ખાનગી કારના એન્જિનના ભાગમાંથી અચાનક ધુમાડા નીકળવા લાગ્યા હતા. જોતજોતામાં આગે એટલું વિકરાળ સ્વરૂપ ધારણ કર્યું કે આખી કાર આગની લપેટમાં આવી ગઈ હતી. રાહદારીઓ અને આસપાસના લોકો આ દ્રશ્ય જોઈને સુરક્ષિત અંતરે ભાગવા લાગ્યા હતા.