પાટણ જિલ્લાના રાધનપુર શહેરમાં આજે વહેલી સવારથી જ તંત્ર દ્વારા દબાણ હટાવવાની મેગા ડ્રાઈવ હાથ ધરવામાં આવી હતી. રાધનપુર નગરપાલિકાના વોર્ડ નંબર 5 માં આવેલી સરકારી જમીન પર વર્ષોથી ખડકાયેલા ગેરકાયદે દબાણો પર આજે 'દાદાનું બુલડોઝર' ફરી વળ્યું હતું. પોલીસના ચુસ્ત બંદોબસ્ત વચ્ચે આ કાર્યવાહી કરવામાં આવી હતી.
કરોડોની જમીન દબાણમુક્ત
તંત્રની આ કામગીરીમાં સિટી સર્વે નંબર 1701 હેઠળ આવતા બલોચ વાસ વિસ્તારમાં અંદાજે 5734 ચોરસ મીટર જેટલી કિંમતી સરકારી જમીન ખાલી કરાવાઈ હતી. વર્ષોથી આ બિનઅધિકૃત જમીન પર રહેઠાણ અને અન્ય પાકા બાંધકામો કરીને દબાણ કરવામાં આવ્યું હતું. તંત્રના જણાવ્યા મુજબ, અગાઉ નોટિસ આપ્યા બાદ જ આ ન્યાયિક પ્રક્રિયા હાથ ધરવામાં આવી છે.