ભારતના દરિયાઈ ઈતિહાસમાં આજે 29 ડિસેમ્બરના રોજ એક નવો અધ્યાય લખાયો છે. અજંતાની ગુફાઓમાં જોવા મળતા 2000 વર્ષ જૂના જહાજોના ચિત્રોના આધારે તૈયાર કરવામાં આવેલું INSV કૌંડિન્યા પોરબંદરના દરિયાકિનારેથી ઓમાનના મસ્કત માટે રવાના થયું છે. આ જહાજ માત્ર એક નૌકા નથી, પરંતુ ભારતની પ્રાચીન જહાજ નિર્માણ કળા અને ગૌરવશાળી વારસાનું જીવંત પ્રતીક છે.

ખીલા વગરનું અદભૂત નિર્માણ

આ જહાજની સૌથી મોટી વિશેષતા એ છે કે તેને બનાવવામાં ક્યાંય પણ લોખંડના ખીલાનો ઉપયોગ કરવામાં આવ્યો નથી. લાકડાના પાટિયાઓને પરંપરાગત રીતે નાળિયેરની દોરીઓ થી સીવીને આખું જહાજ તૈયાર કરવામાં આવ્યું છે. સદીઓ જૂની કુદરતી સામગ્રી અને પદ્ધતિઓનો ઉપયોગ કરીને તેને એ રીતે બનાવવામાં આવ્યું છે કે તે સમુદ્રના મોજાંઓ સામે ટકી શકે. આ ટેકનિક ભારતની પ્રાચીન જહાજ નિર્માણ ક્ષમતાને વિશ્વ સમક્ષ રજૂ કરે છે.

ભવ્ય વિદાય સમારોહ

વેસ્ટર્ન નેવલ કમાન્ડના ફ્લેગ ઓફિસર કમાન્ડિંગ-ઇન-ચીફ, વીએડમિરલ કૃષ્ણા સ્વામિનાથન દ્વારા આ જહાજને લીલી ઝંડી આપી પ્રસ્થાન કરાવવામાં આવ્યું હતું. આ પ્રસંગે ભારતમાં ઓમાનના રાજદૂત મહામહિમ ઇસા સાલેહ અલ શિબાની અને નૌકાદળના ઉચ્ચ અધિકારીઓ ખાસ ઉપસ્થિત રહ્યા હતા.

ભારત-ઓમાન મૈત્રીનો નવો સેતુ

INSV કૌંડિન્યાની આ સફર એ જ પ્રાચીન સમુદ્રી માર્ગો પરથી પસાર થશે જે સદીઓ પહેલા ભારતના પશ્ચિમ કિનારાને ઓમાન સાથે જોડતા હતા. આ અભિયાનથી ભારત અને ઓમાન વચ્ચેના દ્વિપક્ષીય સંબંધો વધુ મજબૂત બનશે. ખાસ કરીને ગુજરાત અને ઓમાન વચ્ચેના વર્ષો જૂના વેપારી અને સાંસ્કૃતિક સંબંધોને આ સફર દ્વારા પુનર્જીવિત કરવામાં આવશે.

નૌકાદળની પ્રતિબદ્ધતા

ભારતીય નૌકાદળ માત્ર સરહદોની રક્ષા જ નહીં, પરંતુ દરિયાઈ વારસાના સંરક્ષણ અને પ્રાદેશિક સહયોગ માટે પણ કટિબદ્ધ છે. INSV કૌંડિન્યાની આ યાત્રા સાબિત કરે છે કે ભારત તેના મૂળિયાં અને સંસ્કૃતિ સાથે જોડાઈને ભવિષ્ય તરફ ડગ માંડી રહ્યું છે. જ્યારે આ જહાજ મસ્કતના કિનારે પહોંચશે, ત્યારે તે સદીઓ જૂની મિત્રતા, પરસ્પર વિશ્વાસ અને આદરનું શક્તિશાળી પ્રતીક બની રહેશે.

આ પણ વાંચો: માંજલપુરમાં યુવકના મોત બાદ તંત્રની કડક કાર્યવાહી, એન્જિનિયર સસ્પેન્ડ, ડેપ્યુટી એન્જિનિયરને નોટિસ