પોરબંદર જિલ્લાના કુતિયાણા પંથકમાં દોઢ વર્ષ પૂર્વે બનેલી એક ગુમશુદાની ઘટનામાં ચોંકાવનારો વળાંક આવ્યો છે. ચૌટા ગામનો નરેન્દ્ર મેથાણીયા નામનો યુવક લાંબા સમયથી ગુમ હતો, જેને શોધવામાં કુતિયાણા પોલીસને આખરે મોટી સફળતા મળી છે. જોકે, આ સફળતા એક કરુણ અંજામ સાથે સામે આવી છે, જેમાં નરેન્દ્ર ગુમ નહીં પણ તેની હત્યા થઈ હોવાનું બહાર આવ્યું છે.
નરેન્દ્રના મિત્ર માલદે દેવા નંદાણીયા પર શંકા ગઈ
ઘટનાની વિગત મુજબ, નરેન્દ્ર મેથાણીયા દોઢ વર્ષ પહેલા અચાનક ગુમ થઈ ગયો હતો. કુતિયાણા પોલીસે આ મામલે તપાસ ચાલુ રાખી હતી. તપાસ દરમિયાન પોલીસને નરેન્દ્રના મિત્ર માલદે દેવા નંદાણીયા પર શંકા ગઈ હતી. પોલીસે શંકાના આધારે માલદેની કડક ઉલટ તપાસ શરૂ કરી હતી. શરૂઆતમાં ગલ્લાતલ્લાં કર્યા બાદ, માલદેએ પોલીસ સામે પોપટ બનીને સત્ય ઓકી દીધું હતું અને કબૂલાત કરી હતી કે તેણે જ નરેન્દ્રની હત્યા કરી છે.