રાજકોટ-ભાવનગર સ્ટેટ હાઈવે પર આજે એક ગમખ્વાર અકસ્માતની ઘટના સામે આવી છે. વીરનગર ગામ પાસે ચાલુ એક્સેન્ટ કારમાં અચાનક આગ ભભૂકી ઉઠતા અફરાતફરીનો માહોલ સર્જાયો હતો. સદનસીબે આ ઘટનામાં કોઈ જાનહાનિ થઈ નથી, પરંતુ કાર સંપૂર્ણપણે બળીને ખાખ થઈ ગઈ છે. આ આગ લાગવાની ઘટનાને કારણે ટ્રાફિક જામના દ્રશ્યો સર્જાયા હતા.
ફાયર બ્રિગેડ અને પોલીસની તાત્કાલિક કાર્યવાહી
આગ લાગવાની ઘટનાની જાણ થતા જ જસદણ ફાયર બ્રિગેડની ટીમ તાત્કાલિક ઘટના સ્થળે દોડી ગઈ હતી અને ભારે જહેમત બાદ આગ પર કાબુ મેળવ્યો હતો. આગ એટલી ભયાનક હતી કે હાઈવે પર દૂર-દૂર સુધી ધુમાડાના ગોટા જોવા મળ્યા હતા. સુરક્ષાના કારણોસર આટકોટ પોલીસ દ્વારા હાઈવેને થોડા સમય માટે વન-વે કરી દેવામાં આવ્યો હતો.
