સમગ્ર રાજ્યની સાથે રાજકોટમાં પણ ઉનાળાનો પારો ઉંચકાતા હિટવેવની સ્થિતિ સર્જાઈ છે. આ કાળઝાળ ગરમીમાં હિટસ્ટ્રોક (લૂ લાગવી) ના કેસો વધવાની શક્યતાને જોતા રાજકોટ સિવિલ હોસ્પિટલ તંત્ર દ્વારા આગોતરી તૈયારીઓ પૂર્ણ કરી લેવામાં આવી છે.
ખાસ હિટવેવ વોર્ડ અને સ્ટાફ
સિવિલ હોસ્પિટલના સત્તાધીશો દ્વારા ખાસ 20 બેડની સુવિધા ધરાવતો અલગ વોર્ડ તૈયાર કરવામાં આવ્યો છે. આ વોર્ડમાં માત્ર હિટસ્ટ્રોક અથવા ગરમીને લગતી ગંભીર બીમારી ધરાવતા દર્દીઓને જ દાખલ કરવામાં આવશે. દર્દીઓની તાત્કાલિક સારવાર માટે નિષ્ણાત તબીબો અને નર્સિંગ સ્ટાફની એક વિશેષ ટીમ પણ ફાળવી દેવામાં આવી છે.
દવાઓ અને સાધન-સામગ્રી
હિટસ્ટ્રોકની સારવારમાં સૌથી મહત્વની એવી ઓક્સિજન સુવિધા, ખાસ પ્રકારના ઇન્જેક્શન અને જીવનરક્ષક દવાઓનો પૂરતો જથ્થો આ વોર્ડમાં હાજર રાખવામાં આવ્યો છે. દર્દીના શરીરનું તાપમાન તાત્કાલિક ઘટાડવા માટે જરૂરી અન્ય મેડિકલ સાધનોની પણ વ્યવસ્થા કરવામાં આવી છે.
એક દર્દી સ્વસ્થ થઈ ઘરે પરત ફર્યો
તંત્રની કામગીરીની સફળતા દર્શાવતા અહેવાલ મુજબ, ગઈકાલે હિટસ્ટ્રોકની અસર હેઠળ આવેલા એક દર્દીને સિવિલમાં દાખલ કરવામાં આવ્યા હતા. સમયસરની સારવાર મળતા દર્દીની તબિયતમાં ઝડપથી સુધારો થયો હતો અને આજે તેમને રજા આપવામાં આવી છે. હોસ્પિટલના સુપરિન્ટેન્ડેન્ટ દ્વારા લોકોને બપોરના સમયે બિનજરૂરી બહાર ન નીકળવા અને વધુ પ્રમાણમાં પ્રવાહી લેવા અપીલ કરવામાં આવી છે.
આ પણ વાંચો: Rajkot: સ્માર્ટ સિટીની જીજાબાઈ ટાઉનશિપમાં પાણીની વિકટ સમસ્યા, રહેવાસીઓ ટેન્કર મંગાવવા મજબૂર
