રાજકોટ શહેરમાં છેલ્લા એક સપ્તાહથી સૂર્યદેવ આકરા પાણીએ જોવા મળી રહ્યા છે. શહેરમાં પડી રહેલી ભીષણ ગરમી અને લૂ (Heatwave) ના પ્રકોપને ધ્યાનમાં રાખીને રાજકોટ મહાનગરપાલિકા અને રાજકોટ શહેર પોલીસ વિભાગ દ્વારા વાહનચાલકોના હિતમાં એક અત્યંત મહત્વનો નિર્ણય લેવામાં આવ્યો છે.
બપોરના સમયે સિગ્નલ મુક્તિ
રાજકોટના રસ્તાઓ પર વાહનચાલકોએ હવે કાળઝાળ ગરમીમાં સિગ્નલ પર ઊભા રહીને શેકાવું નહીં પડે. આજથી જ શહેરના તમામ ટ્રાફિક સિગ્નલો બપોરે 1:00 થી 4:00 વાગ્યા સુધી બંધ રાખવાનો આદેશ આપવામાં આવ્યો છે. આ નિર્ણયનો હેતુ વાહનચાલકોને સીધા તડકાથી બચાવવાનો અને ટ્રાફિક જંકશન પર થતી ગિરદી નિવારવાનો છે.