રાજકોટમાં ફરસાણની વસ્તુઓ ફાફડા અને ગાંઠિયાના ભાવમાં નોંધપાત્ર વધારો જોવા મળ્યો છે, જેના કારણે ગ્રાહકોમાં ચિંતા ફેલાઈ છે. શહેરમાં ફાફડા-ગાંઠિયાના ભાવ પ્રતિ કિલો 20 રૂપિયાથી લઈને 100 રૂપિયા સુધી વધ્યા છે. હાલ બજારમાં તેની કિંમત 600થી 700 રૂપિયા પ્રતિ કિલો સુધી પહોંચી ગઈ છે.
સરેરાશ 50 રૂપિયાનો વધારો થયો
ફરસાણ વેપારીઓના જણાવ્યા અનુસાર માત્ર ફાફડા-ગાંઠિયા જ નહીં પરંતુ અન્ય ફરસાણ વસ્તુઓના ભાવમાં પણ સરેરાશ 50 રૂપિયાનો વધારો થયો છે. આ ભાવવધારા પાછળ મુખ્ય કારણ તરીકે LPG ગેસ સિલિન્ડરની અછત અને કાળા બજારમાં ઊંચા ભાવે મળતા ગેસ સિલિન્ડરોને જવાબદાર ગણાવવામાં આવી રહ્યા છે.
રોજિંદા નાસ્તાની વસ્તુઓ હવે મોંઘી બની
વેપારીઓ કહે છે કે ગેસના વધેલા ખર્ચને કારણે ઉત્પાદન ખર્ચમાં ભારે વધારો થયો છે, જેનો સીધો બોજ ગ્રાહકો પર મુકવો પડી રહ્યો છે. ખાસ કરીને તહેવારો અને સીઝનલ માગ વધતી હોવાને કારણે પણ ભાવમાં વધારો નોંધાયો છે. ગ્રાહકોમાં આ વધેલા ભાવને લઈને અસંતોષ જોવા મળી રહ્યો છે, કારણ કે રોજિંદા નાસ્તાની વસ્તુઓ હવે મોંઘી બની રહી છે. ઘણા લોકોએ સરકારને ભાવ નિયંત્રણ માટે હસ્તક્ષેપ કરવાની માગ કરી છે.
સ્થાનિક પ્રશાસન દ્વારા પરિસ્થિતિ પર નજર રાખવામાં આવી રહી છે અને કાળા બજાર સામે કાર્યવાહી કરવાની તૈયારી દર્શાવવામાં આવી છે. નિષ્ણાતો માને છે કે જો ગેસ સપ્લાય સામાન્ય થશે તો ભાવમાં સ્થિરતા આવી શકે છે.
આ પણ વાંચો : Gujarat News: રાજ્યમાં ઈલેક્ટ્રિક વાહનોના વેચાણમાં 111 ટકાનો ઉછાળો
