રંગીલા રાજકોટમાં વીજચોરો સામે PGVCL (પશ્ચિમ ગુજરાત વીજ કંપની લિમિટેડ) એ લાલ આંખ કરી છે. રાજકોટ શહેરના વિવિધ વિસ્તારોમાં આવેલી 20થી વધુ સોસાયટીઓમાં વીજ કંપનીની 36 ટીમોએ વહેલી સવારથી ત્રાટકીને સર્ચ ઓપરેશન હાથ ધર્યું હતું. આ કાર્યવાહી દરમિયાન અંદાજે 23 લાખ રૂપિયાની વીજચોરી ઝડપાતા સમગ્ર પંથકમાં ફફડાટ વ્યાપી ગયો છે.
બેડીનાકા અને રૈયા રોડ પર 'પાવર' પેકિંગ ચેકિંગ
PGVCLની ટીમોએ ખાસ કરીને બેડીનાકા અને રૈયા રોડ જેવા ગીચ અને રહેણાંક વિસ્તારોને ટાર્ગેટ કર્યા હતા. કોર્પોરેટ ઓફિસના આદેશ અનુસાર, અલગ-અલગ 36 ટીમો દ્વારા પોલીસ બંદોબસ્ત સાથે સોસાયટીઓમાં ચેકિંગ હાથ ધરવામાં આવ્યું હતું. જેમાં રહેણાંક અને કોમર્શિયલ કનેક્શનોની ઝીણવટભરી તપાસ કરવામાં આવી હતી.
