રાજકોટ જિલ્લાના જસદણ તાલુકામાં વનરાજાના આગમનથી ગ્રામ્ય વિસ્તારોમાં ભારે ઉત્તેજના અને ભયનો માહોલ જોવા મળી રહ્યો છે. જસદણના ખારચિયા અને મોટાદડવા ગામ વચ્ચેના સીમ વિસ્તારમાં સિંહના આંટાફેરા જોવા મળ્યા છે. જે કારણે સ્થાનિકોમાં ફફડાટ ફેલાયો છે. સિંહ મેઈન રોડ અને વાડી વિસ્તારોમાં લટાર મારતો હોવાના વીડિયો પણ સોશિયલ મીડિયામાં વાયરલ થયા છે.

મેઈન રોડ પર સિંહના આટાંફેરા

ઘટનાની મળતી માહિતી અનુસાર, ગત રાત્રિના સમયે મોટાદડવા ગામ પાસેના વાડી વિસ્તારમાં અને મુખ્ય માર્ગ પર સિંહ જોવા મળ્યો હતો. સિંહ રોડ ઓળંગીને ખેતરો તરફ જતો હોવાના દ્રશ્યો સીસીટીવી અને લોકોના મોબાઈલ કેમેરામાં કેદ થયા છે. પ્રાથમિક માહિતી મુજબ, આ સિંહ કોટડા સાંગાણી પંથક તરફથી મોટા દડવા ગામ તરફ આવ્યો હોવાનું મનાઈ રહ્યું છે. જસદણ જેવા પંથકમાં સિંહની હાજરીથી વન વિભાગ પણ સતર્ક બન્યું છે.

ખેડૂતોની ચિંતામાં વધારો

હાલ શિયાળુ પાકની સિઝન ચાલી રહ્યું છે, ત્યારે ખેડૂતોને રાત્રિના સમયે ખેતરમાં પિયત (પાણી વાળવા) માટે જવું પડતું હોય છે. સિંહના પગરવને કારણે ખેડૂતો હવે રાત્રે વાડીએ જતાં ડરી રહ્યા છે. સિંહના આંટાફેરાથી ખેતીકામ પર સીધી અસર પડી છે, અને ખેતમજૂરોમાં પણ ભયનો માહોલ છે. ગ્રામજનો દ્વારા તાત્કાલિક ધોરણે વન વિભાગને આ અંગે જાણ કરવામાં આવી છે.


https://x.com/sandeshnews/status/2002606905966067970


વન વિભાગે હાથ ધરી કાર્યવાહી

ઘટનાની જાણ થતા જ વન વિભાગની ટીમ હરકતમાં આવી છે, અને સિંહના લોકેશન પર નજર રાખી રહી છે. વન વિભાગે લોકોને અપીલ કરી છે કે, રાત્રિના સમયે એકલા ખેતરમાં ન જવું અને સિંહ દેખાય તો તેને હેરાન ન કરવો. હાલ સિંહ કઈ દિશામાં આગળ વધી રહ્યો છે, તેની તપાસ ચાલી રહી છે. વનરાજાની આ એન્ટ્રીથી સમગ્ર જસદણ પંથકમાં કુતૂહલ સાથે ફફડાટ ફેલાયો છે.


આ પણ વાંચો - Surat News: મજૂરામાં કાર્યકરો સાથે રંગેચંગે જામી હર્ષ સંઘવીની 'પોંક પાર્ટી', જૂની યાદો સાથે આપ્યું આપ્યું સ્વાદિષ્ટ નિવેદન