રાજકોટના ભરચક વિસ્તાર એવા લીમડા ચોક પાસે આવેલી એક ખાનગી ટ્રાવેલ્સની ઓફિસમાં મારામારીની ઘટના બની છે. આ વિવાદનું કારણ જાણીને સૌ કોઈ હેરાન છે, કારણ કે માત્ર ટ્રાવેલ્સનો મેમો (ટિકિટ/બુકિંગ પહોંચ) કાઢવામાં થયેલી થોડી વાર જેવી સામાન્ય બાબતે ઉગ્ર સ્વરૂપ ધારણ કર્યું હતું. કોઈ ગ્રાહક કે વ્યક્તિ મેમો લેવા માટે ઓફિસ પર આવી હતી. મેમો કાઢવામાં થોડો સમય લાગતા બોલાચાલી થઈ હતી, જે જોતજોતામાં મારામારીમાં ફેરવાઈ ગઈ હતી.
મારામારીની ઘટનાના સીસીટીવી સામે આવ્યા
ઉશ્કેરાયેલા શખ્સોએ ઓફિસના સ્ટાફ સાથે ગેરવર્તણૂક કરી હાથપાઈ શરૂ કરી દીધી હતી. આ સમગ્ર હિંસક ઘટના ઓફિસમાં લાગેલા સીસીટીવી કેમેરામાં કેદ થઈ ગઈ છે. વીડિયોમાં સ્પષ્ટ જોઈ શકાય છે કે કઈ રીતે લોકો એકબીજા પર તૂટી પડ્યા હતા અને ઓફિસમાં અફરાતફરીનો માહોલ સર્જાયો હતો. આ વીડિયો સોશિયલ મીડિયા પર વાયરલ થયા બાદ લોકોમાં કાયદો અને વ્યવસ્થાની સ્થિતિને લઈને ચર્ચા જાગી છે.
