સુરત શહેરના ઇચ્છાપોર વિસ્તારમાં એક સગીર વયની કિશોરી સાથે દુષ્કર્મની ચોંકાવનારી ઘટના સામે આવી છે. 25 વર્ષીય વિધર્મી યુવકે 16 વર્ષીય કિશોરીને સોશિયલ મીડિયાના માધ્યમથી પ્રેમજાળમાં ફસાવી તેની સાથે શારીરિક અડપલાં અને દુષ્કર્મ આચર્યું હોવાનું બહાર આવ્યું છે. પોલીસે આ મામલે ત્વરિત કાર્યવાહી કરી આરોપીની ધરપકડ કરી લીધી છે.
ઇચ્છાપોર વિસ્તારમાં કિશોરી સાથે દુષ્કર્મ
પ્રાપ્ત માહિતી અનુસાર, ભોગ બનનાર 16 વર્ષીય કિશોરી અને આરોપી મોહમ્મદ સાજીદ (ઉંમર 25 વર્ષ) વચ્ચે સોશિયલ મીડિયા પ્લેટફોર્મ પર પરિચય થયો હતો. આ ઓળખાણ ધીરે ધીરે મિત્રતામાં પરિણમી હતી. જેનો ગેરલાભ ઉઠાવી આરોપીએ કિશોરી સાથે દુષ્કર્મ આચર્યું હતું. આ ઘટનાની જાણ પરિવારને ત્યારે થઈ જ્યારે કિશોરીના મોબાઈલ ફોનમાંથી વાંધાજનક ફોટા મળી આવ્યા હતા. ફોટા જોતા જ પરિવારના પગ નીચેથી જમીન સરકી ગઈ હતી અને સમગ્ર ભાંડો ફૂટ્યો હતો.
