સુરતની વિવિધ ફેક્ટરીઓમાં કામ કરતા પશ્ચિમ બંગાળના હજારો કામદારો આજે વતન જવા રવાના થયા છે. પશ્ચિમ બંગાળમાં બીજા તબક્કાના મતદાનમાં ભાગ લેવા માટે સુરતના ઉધના રેલવે સ્ટેશન પરથી અંદાજે 4,000 જેટલા મતદારો ટ્રેન મારફતે રવાના થયા હતા.

ઉધના સ્ટેશન પર મતદારોનું કીડિયારું ઉભરાયું

પશ્ચિમ બંગાળના વિવિધ જિલ્લાઓના વતની અને સુરતમાં રોજગારી માટે સ્થાયી થયેલા કામદારો મોટી સંખ્યામાં રાત્રિના સમયે ઉધના સ્ટેશન પર એકઠા થયા હતા. ખાસ ટ્રેનો અને નિયમિત ટ્રેનોમાં આ શ્રમિકો પોતાના મતાધિકારનો ઉપયોગ કરવા માટે ઉત્સાહભેર નીકળ્યા હતા. આટલી મોટી સંખ્યામાં મતદારોનું સ્થળાંતર ચૂંટણીના પરિણામો પર મોટી અસર કરી શકે છે.

પરિવર્તનની લહેર અને રાજકીય ઝુકાવ

રેલવે સ્ટેશન પર હાજર મતદારોમાં રાજકીય ચર્ચાઓનો માહોલ ગરમ જોવા મળ્યો હતો. અનેક મતદારોએ મીડિયા સાથેની વાતચીતમાં જણાવ્યું હતું કે, "અમે આ વખતે પશ્ચિમ બંગાળમાં મોટો બદલાવ ઈચ્છીએ છીએ." કેટલાક મતદારોએ તો ખુલીને પોતાનો મત વ્યક્ત કરતા કહ્યું હતું કે, તેઓ આ વખતે ભાજપ (BJP) ને વોટ આપીને બંગાળના વિકાસમાં ભાગીદાર બનશે. રોજગારી માટે વતન છોડવું પડ્યું હોવાનો વસવસો પણ અનેક શ્રમિકોના અવાજમાં જોવા મળ્યો હતો.

આ પણ વાંચો: Bharuch: આમોદના વાડિયા ગામની સીમમાંથી ગુમ થયેલા વ્યક્તિનો મળ્યો મૃતદેહ,પોલીસે રહસ્યમય મોત અંગે તપાસ શરૂ કરી