સુરતના કાપડ ઉદ્યોગમાં વેપારીઓ સાથે છેતરપિંડી કરનારા તત્વો સામે પોલીસે લાલ આંખ કરી છે. સારોલી ટેક્સટાઇલ માર્કેટના એક વેપારી સાથે ₹39.93 લાખથી વધુની છેતરપિંડી કરી ફરાર થઈ ગયેલા મુખ્ય આરોપી જયદીપ ઉર્ફે વિજય જગદીશભાઇ સોનીને સારોલી પોલીસે અમદાવાદના નિકોલ વિસ્તારમાંથી દબોચી લીધો છે.
પહેલા વિશ્વાસ જીત્યો પછી લાખોનો ચૂનો લગાવ્યો
પોલીસ તપાસમાં બહાર આવ્યું છે કે, આરોપી જયદીપ સોની દલાલો મારફતે કાપડ માર્કેટના વેપારીઓનો સંપર્ક કરતો હતો. શરૂઆતના તબક્કે તે નાની રકમનો માલ મંગાવી તેનું સમયસર પેમેન્ટ ચૂકવી દેતો હતો, જેથી વેપારીઓમાં તેના પ્રત્યે વિશ્વાસ બેસે. એકવાર વિશ્વાસ સંપાદિત કર્યા બાદ, આરોપીએ સારોલી માર્કેટના વેપારી પાસેથી ₹39.93 લાખનો મોટો જથ્થો મંગાવ્યો હતો. માલ મળતાની સાથે જ આરોપી પોતાની દુકાનો બંધ કરી રાતોરાત ફરાર થઈ ગયો હતો.
