શહેરમાં સરકારી નોકરી અપાવવાના બહાને નિર્દોષ લોકોને નિશાન બનાવી લાખો રૂપિયાની છેતરપિંડી આચરતા તત્વો સામે સુરત પોલીસે લાલ આંખ કરી છે. સુરત પોલીસની ઝોન-6ની ટીમે મહારાષ્ટ્ર બોર્ડર પરથી એક એવા શખ્સની ધરપકડ કરી છે, જેણે સરકારી નોકરી અપાવવાની લાલચ આપી 4 લાખ રૂપિયાની છેતરપિંડી આચરી હતી.
સરકારી નોકરી અપાવવાના બહાને છેતરપિંડી
પકડાયેલા આરોપીનું નામ અશ્વિન પ્રભાતસિંહ પાડવી છે. આરોપીએ ફરિયાદીને વિશ્વાસમાં લીધા હતા કે તે સરકારી વિભાગમાં વગ ધરાવે છે અને તેમને નોકરી અપાવી દેશે. આ બહાને તેણે કટકે-કટકે રૂપિયા 4 લાખ પડાવી લીધા હતા. એકવાર નાણાં મળી ગયા બાદ, આરોપીએ અલગ-અલગ બહાના બતાવી ફરિયાદી સાથેનો સંપર્ક તોડી નાખ્યો હતો અને ફોન બંધ કરીને ફરાર થઈ ગયો હતો.