સુરત જિલ્લાના માંગરોળ વિસ્તારમાં આજે એક અત્યંત કરૂણ અને ગમખ્વાર અકસ્માતની ઘટના સામે આવી છે, જેમાં એક યુવકે પોતાનો જીવ ગુમાવ્યો છે. પ્રાપ્ત માહિતી અનુસાર, મૃતક યુવક પોતાની નોકરી પરથી બાઇક લઈને ઘરે પરત ફરી રહ્યો હતો. આ દરમિયાન, રોડ પર પૂરપાટ ઝડપે આવી રહેલા એક ડમ્પરના ચાલકે બેફામ રીતે બાઇકને અડફેટે લીધી હતી. આ ભયાનક ટક્કરને કારણે યુવક ગંભીર રીતે ઇજાગ્રસ્ત થયો હતો અને તેનું ઘટનાસ્થળે જ કમકમાટીભર્યું મોત નીપજ્યું હતું.
માંગરોળમાં ભયાનક અકસ્માતથી ખળભળાટ
અકસ્માત બાદ ઘટનાસ્થળે લોકોના ટોળાં એકઠા થઈ ગયા હતા. બનાવની જાણ થતાં જ કોસંબા પોલીસનો કાફલો તાત્કાલિક સ્થળ પર પહોંચ્યો હતો. પોલીસે મૃતદેહનો કબજો મેળવી પોસ્ટમોર્ટમ માટે મોકલી આપ્યો છે અને અકસ્માત સર્જી ફરાર થઈ ગયેલા ડમ્પર ચાલક વિરુદ્ધ ગુનો નોંધી, આગળની વધુ તપાસ હાથ ધરી છે. આ ગોઝારી ઘટનાએ ફરી એકવાર ભારે વાહનોની બેફામ ગતિ અને ટ્રાફિક નિયમોના ઉલ્લંઘન પર ગંભીર સવાલો ઊભા કર્યા છે.
