સુરત ક્રાઈમ બ્રાન્ચે એક પ્રશંસનીય કામગીરી કરીને આંતરરાજ્ય સ્તરે કરોડો રૂપિયાની છેતરપિંડી આચરનાર એક સાયબર ગુનેગારને ઝડપી પાડ્યો છે. સુરતમાંથી ઝડપાયેલા આ આરોપીનું નામ જીગ્નેશ ઉર્ફે જીગો મિસ્ત્રી ધીરજલાલ વઘાડીયા છે. આ શખ્સે દેશના દક્ષિણ રાજ્ય કર્ણાટકમાં એક માસૂમ અને વયોવૃદ્ધ મહિલાને ડિજિટલ અરેસ્ટના સકંજામાં લઈને અબજોપતિઓની જેમ મોટી રકમ પડાવી લીધી હતી.
90 વર્ષના વૃદ્ધાને બનાવ્યા શિકાર
આ કેસની વિગત એવી છે કે, આરોપી જીગ્નેશ ઉર્ફે જીગાએ કર્ણાટકના કોલાર વિસ્તારમાં રહેતા એક ૯૦ વર્ષના વૃદ્ધાને ઓનલાઇન માધ્યમથી ટાર્ગેટ કર્યા હતા. તેણે કમ્પ્યુટર અને વીડિયો કોલિંગ એપ્લિકેશન દ્વારા વૃદ્ધાનો સંપર્ક કરીને પોતે દેશની સર્વોચ્ચ તપાસ સંસ્થા સીબીઆઈ (CBI) અને દિલ્હી પોલીસના ઉચ્ચ અધિકારી હોવાની ઓળખ આપી હતી. આરોપીએ વૃદ્ધા પર કોઈ ગંભીર ગુનામાં સામેલ હોવાનો ખોટો આરોપ લગાવી, ધરપકડની બીક બતાવીને તેમને કલાકો સુધી કેમેરા સામે 'ડિજિટલ અરેસ્ટ' એટલે કે નજરકેદ રાખ્યા હતા. ત્યારબાદ કેસ રફાદફા કરવાના નામે કટોકટી ઊભી કરીને વૃદ્ધા પાસેથી કટકે-કટકે કુલ રૂપિયા 1.34 કરોડ પડાવી લીધા હતા.