સુરત શહેરમાં લુખ્ખા તત્વો અને વેપારીઓને ડરાવી-ધમકાવી ખંડણી કે લૂંટ ચલાવતા અસામાજિક તત્વો સામે સુરત પોલીસ કમિશનરની સૂચનાથી ક્રાઇમ બ્રાન્ચે કડક ઝુંબેશ આદરી છે. આ અંતર્ગત સચિન વિસ્તારમાં બનેલી લૂંટની ઘટનાનો ભેદ ઉકેલીને સુરત ક્રાઇમ બ્રાન્ચે 21 જેટલા વિવિધ ગુનાહિત ઇતિહાસ ધરાવતા રીઢા ગુનેગાર સુબોધ ધર્મેન્દ્રભાઈ રામાણીની ધરપકડ કરી લીધી છે.

માવો ખાઈને પૈસા માંગતા વેપારી પર તૂટી પડ્યો

આ કેસની વિગત એવી છે કે, થોડા દિવસો પૂર્વે આરોપી સુબોધ રામાણી સચિન વિસ્તારમાં આવેલા એક ફરિયાદીના પાનના ગલ્લા પર ગયો હતો. ત્યાં તેણે મફતમાં પાન-માવા ખાયા હતા. ગલ્લાના સંચાલકે જ્યારે કાયદેસરના પૈસા માંગ્યા, ત્યારે આરોપી ઉશ્કેરાઈ ગયો હતો. તેણે વેપારીને ગાળો ભાંડીને બેરહેમીપૂર્વક માર માર્યો હતો અને ઊલટાનું ધમકાવીને ગલ્લાના કાઉન્ટર (ગલ્લા) માંથી રોકડા રૂપિયા ૭ થી ૮ હજારની લૂંટ ચલાવીને બિન્દાસ્ત રીતે ફરાર થઈ ગયો હતો. આ અંગે સચિન પોલીસ મથકે ગુનો નોંધાતા જ ક્રાઇમ બ્રાન્ચ સક્રિય થઈ હતી.

3 વખત પાસા અને સાબરમતી જેલનો ઇતિહાસ

પકડાયેલો આરોપી સુબોધ રામાણી સુરત પોલીસ ચોપડે એક અત્યંત માથાભારે અને રીઢો ગુનેગાર સાબિત થયો છે. પોલીસના સત્તાવાર રેકોર્ડ મુજબ આરોપી સામે અગાઉ હત્યાનો પ્રયાસ, લૂંટ, ચોરી, શરીર સંબંધી ગુનાઓ સહિત કુલ 21 ગંભીર ગુનાઓ નોંધાઈ ચૂક્યા છે.તેની ગુનાહિત પ્રવૃત્તિઓ પર અંકુશ લાવવા માટે અગાઉ સુરત પોલીસ દ્વારા 3 વખત પાસા હેઠળ કાર્યવાહી કરવામાં આવી ચૂકી છે.આ પાસાના વરંટના આધારે તે અમદાવાદની પ્રખ્યાત સાબરમતી જેલમાં પણ સજા કાપીને બહાર આવ્યો છે. જેલમાંથી છૂટ્યા બાદ સુબોધે સુધરવાના બદલે ફરી ગુનાખોરીનો આશરો લીધો હતો. સુરત ક્રાઇમ બ્રાન્ચે બાતમીદારો અને ટેકનિકલ સોર્સના આધારે વોચ ગોઠવી તેને ઝડપી પાડ્યો છે અને સચિન પોલીસને સોંપવાની તજવીજ હાથ ધરી છે.

આ પણ વાંચો: Gandhinagar: પ્રખ્યાત 'ટેરાનોવાસ પીઝા'માં જીવતો વંદો નીકળ્યો, ગ્રાહકોના સ્વાસ્થ્ય સાથે ગંભીર ચેડાં