ડ્રગ્સ મુક્ત ગુજરાતના અભિયાન વચ્ચે સુરત પોલીસ એક્શન મોડમાં જોવા મળી રહી છે. શહેરના વ્યસ્ત ગણાતા વરાછા વિસ્તારમાં પોલીસે એક કરિયાણાની દુકાનમાં દરોડા પાડીને મોટી માત્રામાં પ્રતિબંધિત ગોગો પેપર અને શંકાસ્પદ નશીલા પદાર્થનો જથ્થો ઝડપી પાડતા ચકચાર મચી ગઈ છે.
કરિયાણાની દુકાનમાં પોલીસના દરોડા
વરાછા પોલીસને બાતમી મળી હતી કે એક કરિયાણાની દુકાનમાં પ્રતિબંધિત ચીજવસ્તુઓનું વેચાણ થઈ રહ્યું છે. આ બાતમીના આધારે પોલીસે દરોડો પાડતા દુકાનમાંથી અંદાજે 800 નંગ ગોગો પેપર મળી આવ્યા હતા. નોંધનીય છે કે, થોડા સમય પહેલા જ રાજ્ય સરકાર દ્વારા ગોગો પેપરના વેચાણ અને સંગ્રહ પર કડક પ્રતિબંધ લાદવામાં આવ્યો હતો, તેમ છતાં તેનું વેચાણ થતું હોવાનું સામે આવ્યું છે.
