Surat: DYCM હર્ષ સંઘવી દ્વારા BLOની કામગીરીનું નિરીક્ષણ, મતદાર યાદી સુધારણા કાર્યક્રમની સમીક્ષા

ભારતના ચૂંટણીપંચ દ્વારા હાલમાં સ્પેશિયલ સમરી રિવિઝન (SSR) હેઠળ મતદાર યાદી સુધારણા કાર્યક્રમ ચાલી રહ્યો છે, જેના ભાગરૂપે રાજ્યના નાયબ મુખ્યમંત્રી હર્ષ સંઘવીએ સુરત શહેરના વિવિધ બૂથો પર જઈને બૂથ લેવલ ઓફિસર (BLO) ની કામગીરીનું નિરીક્ષણ કર્યું હતું. તેમણે ખાસ કરીને તેમના મત વિસ્તારમાં આવેલ દયાળજી કસનજી વિદ્યાલયમાં BLOની કામગીરીની સમીક્ષા કરી હતી અને તમામ BLO સાથે ચર્ચાઓ કરીને તેમનો આભાર માન્યો હતો.

 BLOની કામગીરીનું DYCMએ નિરીક્ષણ કર્યું

આ નિરીક્ષણ બાદ મીડિયા સાથે વાત કરતાં DYCM હર્ષ સંઘવીએ BLOની નિષ્ઠા અને સમર્પણની પ્રશંસા કરી હતી. તેમણે જણાવ્યું કે, “લોકશાહીના આ પર્વને મજબૂત બનાવવા માટે છેલ્લા 21 દિવસથી BLO પોતાની નિષ્ઠાપૂર્વક રાત-દિવસ કામગીરી નિભાવી રહ્યા છે. પોતાની નાની-મોટી તકલીફોને બાજુમાં મૂકીને તેઓ કાર્ય કરી રહ્યા છે.” તેમણે ઉમેર્યું કે, તેઓ તેમના મત વિસ્તારના લોકો વતી આ તમામ BLOનો આભાર માનવા માટે નીકળ્યા છે.

BLO ઉપર ઓછું ભારણ રહે તે માટેનું આયોજન

BLOની કામગીરીને કારણે વિદ્યાર્થીઓના અભ્યાસ પર થતી અસર અંગે પૂછવામાં આવતાં, હર્ષ સંઘવીએ આ બાબતને ધ્યાનમાં રાખીને કરાયેલા આયોજનની માહિતી આપી હતી. તેમણે જણાવ્યું કે, “રાજ્યના તમામ શહેરો અને જિલ્લાઓમાં કલેક્ટર દ્વારા આ બાબતને ધ્યાનમાં રાખીને આજુબાજુના કોલેજો અને ITIના કર્મચારીઓને પણ આ કામગીરીમાં લેવામાં આવી રહ્યા છે. જેથી BLO ઉપર ઓછામાં ઓછું ભારણ રહે તે માટેનું આયોજન કરવામાં આવ્યું છે.” આ પગલું મતદાર યાદી સુધારણા કાર્યક્રમની અસરકારકતા જાળવી રાખવા સાથે શૈક્ષણિક કાર્યમાં ઓછામાં ઓછો અવરોધ ઊભો થાય તે સુનિશ્ચિત કરે છે. હર્ષ સંઘવીનું આ નિરીક્ષણ દર્શાવે છે કે રાજ્ય સરકાર ચૂંટણી પંચના આ મહત્ત્વપૂર્ણ કાર્યક્રમની સફળતા માટે પ્રતિબદ્ધ છે અને જમીની સ્તરે કાર્ય કરતા કર્મચારીઓને પ્રોત્સાહિત કરવા માંગે છે.

આ પણ વાંચો: વીજ વાયરની ચોરી કરવા જતાં યુવકનું કરંટ લાગવાથી ઘટનાસ્થળે મોત