સુરતના લિંબાયત વિસ્તારમાં આવેલ આંજણા ફાર્મ પાસે આજે એક ચોંકાવનારી આગની દુર્ઘટના બની છે. રસ્તા પર ફેંકવામાં આવેલા કચરાને સળગાવવાની એક નાનકડી ભૂલે કાર માલિકને લાખોનો ફટકો માર્યો છે. આ આગમાં એક કાર સંપૂર્ણપણે બળી ગઈ છે, જેમાં રહેલી મોટી રોકડ રકમ પણ ખાખ થઈ હોવાનું સામે આવ્યું છે.
કચરાની આગમાં કાર બળીને ખાખ
ઘટનાની વિગતો મુજબ, આંજણા ફાર્મ પાસે રસ્તા પર કોઈ અજાણ્યા વ્યક્તિ દ્વારા કચરો સળગાવવામાં આવ્યો હતો. જોતજોતામાં આ આગે વિકરાળ સ્વરૂપ ધારણ કર્યું હતું અને નજીકમાં જ પાર્ક કરેલી એક કારને પોતાની ઝપેટમાં લઈ લીધી હતી. આગ એટલી ઝડપથી ફેલાઈ હતી કે કારના માલિકને કંઈ સમજાય તે પહેલા જ કાર ભડભડ સળગવા લાગી હતી.
10 લાખની રોકડ બળી ગઈ
આ ઘટનામાં સૌથી મોટું નુકસાન આર્થિક રીતે થયું છે. કાર માલિકના દાવા મુજબ, કારમાં રૂપિયા 10 લાખની રોકડ રકમ રાખવામાં આવી હતી. આગ એટલી ભયાનક હતી કે કારનો મોટાભાગનો હિસ્સો બળીને ખાખ થઈ ગયો હતો અને તેની સાથે અંદર રહેલી તમામ રોકડ પણ બળીને રાખ થઈ ગઈ હતી.
ફાયર બ્રિગેડની કાર્યવાહી
આગ લાગતા જ વિસ્તારમાં ભારે અફરાતફરીનો માહોલ સર્જાયો હતો. ઘટનાની જાણ થતા જ સુરત ફાયર વિભાગની ટીમ તાત્કાલિક ઘટનાસ્થળે પહોંચી હતી અને પાણીનો મારો ચલાવી આગ પર કાબૂ મેળવ્યો હતો. સદનસીબે આ દુર્ઘટનામાં કોઈ જાનહાનિ થઈ નથી, પરંતુ કાર માલિકને લાખો રૂપિયાનું નુકસાન વેઠવાનો વારો આવ્યો છે.
આ પણ વાંચો: Amreli: પાલનપુર અને અમરેલીમાં બોમ્બની ધમકી, પાસપોર્ટ અને પોસ્ટ ઓફિસો ખાલી કરાવાઈ
