સુરતના રાંદેર વિસ્તારમાં આવેલી જનની ગાયનેક હોસ્પિટલમાં એક હૃદયદ્રાવક ઘટના સામે આવી છે. હોસ્પિટલના સ્ટાફની ડ્યુટી ફાળવવા જેવી સામાન્ય બાબતે થયેલા આંતરિક ઝઘડાએ વિકરાળ સ્વરૂપ ધારણ કરતા, વર્ષોનો અનુભવ ધરાવતા સિનિયર નર્સે હોસ્પિટલના ઓપરેશન થિયેટરમાં જ ઝેરી કેમિકલ પીને આત્મહત્યા કરી લીધી છે.
સાથી કર્મચારીઓ સાથે થયો હતો વિવાદ
મળતી માહિતી મુજબ, પાલ વિસ્તારના સુડા આવાસમાં રહેતા 45 વર્ષીય અમિષાબેન હેમંતભાઈ શર્મા છેલ્લા સાડા ત્રણ વર્ષથી જનની ગાયનેક હોસ્પિટલમાં હેડ નર્સ તરીકે ફરજ બજાવતા હતા. તેઓ ઓપરેશન થિયેટરના ઇન્ચાર્જ હોવાની સાથે સ્ટાફની ડ્યુટીનું લિસ્ટ પણ તૈયાર કરતા હતા. તાજેતરમાં તેમણે બનાવેલા ડ્યુટી લિસ્ટને લઈ સાથી કર્મચારીઓ સાથે ઉગ્ર બોલાચાલી થઈ હતી. કર્મચારીઓએ ડ્યુટી બરાબર ફાળવી ન હોવાના આક્ષેપો કરતા અમિષાબેનને અત્યંત માઠું લાગી આવ્યું હતું.
