સુરત ગ્રામ્ય વિસ્તારમાં ડેટિંગ એપ્લિકેશન દ્વારા હનીટ્રેપ રચી લોકોને બ્લેકમેલ કરતી એક ખતરનાક ગેંગને બારડોલી રૂરલ પોલીસ અને એલસીબીએ ઝડપી પાડી છે. મોતા ગામની રાધાકૃષ્ણ સોસાયટીમાં એક યુવાનને બળાત્કારના કેસમાં ફસાવી દેવાની ધમકી આપી અઢી લાખ રૂપિયાની માંગણી કરવામાં આવી હતી.
ડેટિંગ એપથી જાળ બિછાવી નકલી પોલીસ બની માર માર્યો
ઘટનાની વિગત મુજબ, આ ગેંગ 'કયુક કયુક' (QuackQuack) જેવી ડેટિંગ એપ્લિકેશનનો ઉપયોગ કરી યુવાનોને સોશિયલ મીડિયા પર પોતાની જાળમાં ફસાવતી હતી. ફરિયાદીના ભાઈને આ ગેંગની મહિલાઓએ મોતા ગામે રાધાકૃષ્ણ સોસાયટીના એક મકાનમાં મળવા બોલાવ્યો હતો. યુવાન જેવો ત્યાં પહોંચ્યો કે તરત જ પૂર્વયોજિત કાવતરા મુજબ અન્ય ચાર શખ્સો ત્યાં ધસી આવ્યા હતા.આ શખ્સોએ પોતાની ઓળખ પોલીસ તરીકે આપી હતી અને યુવાનને ઢોર માર માર્યો હતો. આરોપીઓએ ધમકી આપી હતી કે, "તું અહીં મહિલા સાથે શું કરે છે? તારા પર બળાત્કારનો કેસ દાખલ કરી જેલમાં મોકલી આપીશું." યુવાન ગભરાઈ જતાં આરોપીઓએ કેસ પતાવવાના બદલામાં ₹2.50 લાખની માંગણી કરી હતી.
