સુરત જિલ્લામાં ગેરકાયદેસર ખનન અને વહન કરતા તત્વો સામે ભૂસ્તર વિભાગે લાલ આંખ કરી છે. સુરત ભૂસ્તર વિજ્ઞાન અને ખનિજ વિભાગની ટીમે એક મોટી કાર્યવાહી કરતા કામરેજ તાલુકામાંથી ગેરકાયદેસર રેતી ભરીને જતા વાહનો પર ત્રાટકીને મોટો સપાટો બોલાવ્યો છે. વિભાગ દ્વારા અલગ-અલગ જગ્યાએથી રોયલ્ટી પાસ વગર રેતીનું વહન કરી રહેલી કુલ 8 જેટલી ટ્રકોને ઝડપી પાડી કાયદેસરની કાર્યવાહી હાથ ધરવામાં આવી છે.
માન્ય રોયલ્ટી પાસ કે દસ્તાવેજો મળી આવ્યા ન હતા
મળતી વિગતો અનુસાર, સુરત જિલ્લાના કામરેજ તાલુકાના વાવ ગામેથી રેતી ભરેલી ટ્રકો રોયલ્ટી ચોરી કરીને પસાર થવાની હોવાની ચોક્કસ બાતમી ભૂસ્તર વિભાગને મળી હતી. આ બાતમીના આધારે અધિકારીઓની ટીમે વાવ ગામ નજીક વોચ ગોઠવીને ઓચિંતું ચેકિંગ હાથ ધર્યું હતું. આ દરમિયાન ત્યાંથી પસાર થઈ રહેલી 8 જેટલી શંકાસ્પદ ટ્રકોને અટકાવીને તેમના રોયલ્ટી પાસની તપાસ કરવામાં આવી હતી. તપાસ દરમિયાન આ ટ્રકો પાસે કોઈ પણ પ્રકારના માન્ય રોયલ્ટી પાસ કે દસ્તાવેજો મળી આવ્યા ન હતા.