સુરત શહેરમાં મોબાઇલ ચોરીની ઘટનાઓ પર અંકુશ લાવવા માટે સુરત શહેર પોલીસે કડક કાર્યવાહી શરૂ કરી છે. જેના ભાગરૂપે અઠવાલાઇન્સ પોલીસ દ્વાકા ચોરીના ગુનામાં સંડોવાયેલા ત્રણ આરોપીઓને ઝડપી લેવામાં આવ્યા છે. આ આરોપીઓ પાસેથી કુલ 13 મોબાઇલ ફોન કબ્જે કરવામાં આવ્યા છે, જેની કુલ કિંમત આશરે 80,000 રૂપિયા જેટલી આંકવામાં આવી છે. આ સફળ કામગીરીથી અઠવાલાઇન્સ વિસ્તારમાં થયેલી ચોરીના અનેક ગુનાઓનો ભેદ ઉકેલાયો છે.
ત્રણેય શખ્સો મોબાઈલ ચોરીની પ્રવૃત્તિમાં સક્રિય હતા
પોલીસ દ્વારા મળેલી માહિતી મુજબ, અંકિત ઇશ્વરભાઈ વળવી, સમીર ઉર્ફે શીરપુર સકીલ શેખ અને અજય કેદાર પટેલ નામના ત્રણેય શખ્સો મોબાઈલ ચોરીની પ્રવૃત્તિમાં સક્રિય હતા. આ ત્રિપુટી શહેરમાં ભીડભાડવાળી જગ્યાઓનો ફાયદો ઉઠાવીને લોકોના ખિસ્સામાંથી કે હાથમાંથી મોબાઈલ ફોનની ચોરી કરતા હતા.
