સુરત શહેરમાં 'રોફ' જમાવવાની ઘેલછામાં કાયદાનું ઉલ્લંઘન કરી જાહેરમાં બેફામ બનતા તત્વો સામે પોલીસે લાલ આંખ કરી છે. આવો જ એક કિસ્સો સુરતના પાંડેસરા વિસ્તારમાં સામે આવ્યો હતો, જ્યાં જાહેરમાં લોકોનું ટોળું ભેગું કરીને કેક કાપવાની સ્ટાઇલમાં જન્મદિવસની ગેરકાયદેસર ઉજવણી કરનાર અને તેનો વિડિયો બનાવી સોશિયલ મીડિયા પર 'વટ' પાડવાનો પ્રયાસ કરનાર એક શખ્સને પાંડેસરા પોલીસે ઝડપી પાડ્યો છે.
મિત્રો અને ચાહકોને ભેગા કરીને ધમાકેદાર ઉજવણી કરી
પોલીસ સૂત્રો પાસેથી મળતી માહિતી મુજબ, 'પિન્ટુ' નામનો આ શખ્સ પાંડેસરાના જાહેર રસ્તા પર પોતાના મિત્રો અને ચાહકોને ભેગા કરીને ધમાકેદાર ઉજવણી કરી રહ્યો હતો, જાણે તેને કાયદાનો કોઈ ડર જ ન હોય. તેણે આ ઉજવણીનો વિડિયો બનાવીને વાયરલ પણ કર્યો હતો, જેમાં તે ખુલ્લેઆમ કાયદાના નિયમોની ધજ્જીયા ઉડાવતો જોવા મળ્યો હતો.
