ડાયમંડ સિટી તરીકે જાણીતા સુરત શહેરમાં એક બાદ એક આગ લાગવાની ઘટનાઓ સામે આવી રહી છે. ગત અઠવાડિયામાં આગ લાગવાની ઘટનાઓમાં વધારો નોંધાયો છે. આવામાં વધુ એક આગ લાગવાની ઘટના સામે આવતા સમગ્ર પંથકમાં અરેરાટી વ્યાપી ગઈ છે. અડાજણ વિસ્તારમાં આજે આગની એક મોટી ઘટના સામે આવી છે. અડાજણના મધુવન સર્કલ પાસે આવેલા એક ગાદલા બનાવવાના ગોડાઉનમાં અચાનક આગ ફાટી નીકળતા સમગ્ર વિસ્તારમાં અફરાતફરીનો માહોલ સર્જાયો હતો. જોકે, સદનસીબે આ ઘટનામાં કોઈ જાનહાનિ થઈ નથી.
ગોડાઉનમાં આગ લાગતા ધુમાડાના ગોટેગોટા ઉડ્યા
ઘટનાની મળતી માહિતી અનુસાર, સુરત શહેરના અડાજણ મધુવન સર્કલ પાસે સ્થિત ગાદલાના ગોડાઉનમાં અચાનક આગ લાગી હતી. ગાદલામાં વપરાતું મટીરિયલ અત્યંત જ્વલનશીલ હોવાથી આગે જોતજોતામાં વિકરાળ સ્વરૂપ ધારણ કરી લીધું હતું. આકાશમાં કાળા ધુમાડાના ગોટેગોટા દૂર-દૂર સુધી જોવા મળતા લોકોમાં ભયનો માહોલ ફેલાયો હતો. ગોડાઉનમાં કામ કરતા લોકો અને આસપાસના રહીશોમાં આગને પગલે ભારે દોડધામ મચી ગઈ હતી.
