સુરતના અડાજણ વિસ્તારમાં અસામાજિક તત્ત્વોનો ત્રાસ દિવસેને દિવસે વધી રહ્યો છે, જેના કારણે સ્થાનિક રહેવાસીઓમાં ભયનો માહોલ ફેલાયો છે. તાજેતરમાં જ, અડાજણના હની પાર્ક વિસ્તાર પાસે બે જૂથ વચ્ચે મારામારીની ગંભીર ઘટના બની હતી, જેના સીસીટીવી ફૂટેજ સામે આવતા સમગ્ર ઘટનાનો પર્દાફાશ થયો છે.
અડાજણમાં અસામાજિક તત્વોનો આતંક
પ્રાપ્ત માહિતી મુજબ, હની પાર્ક નજીકના જાહેર રસ્તા પર બે જૂથના યુવકો કોઈ જૂની બાબતને લઈને ઉગ્ર બોલાચાલી બાદ સામસામે આવી ગયા હતા. થોડી જ વારમાં આ બોલાચાલીએ ઉગ્ર સ્વરૂપ ધારણ કર્યું હતું અને બંને પક્ષોએ એકબીજા સાથે મારામારી શરૂ કરી દીધી હતી. કેટલાક યુવકો ભેગા મળીને જાહેર માર્ગ પર જ હિંસક રીતે ઝઘડી રહ્યા હતા, જેના કારણે વિસ્તારમાં ભયનું વાતાવરણ સર્જાયું હતું. આ સમગ્ર મારામારીની ઘટના ત્યાં લગાવેલા સીસીટીવી કેમેરામાં સ્પષ્ટપણે કેદ થઈ છે. ફૂટેજમાં જોઈ શકાય છે કે કેવી રીતે આ યુવકો કોઈ પણ ડર વગર જાહેરમાં કાયદાનો ભંગ કરીને હિંસા આચરી રહ્યા છે.
