દક્ષિણ ગુજરાતના આર્થિક કરોડરજ્જુ સમાન કાપડ ઉદ્યોગ માટે રાજ્ય સરકાર તરફથી મોટા સમાચાર મળી રહ્યા છે. ઇન્ડસ્ટ્રીને ગેસ આપવાની જાહેરાત અને તેના અમલીકરણ સાથે જ સુરતના કાપડ ઉદ્યોગમાં ફરી એકવાર તેજીનો માહોલ જોવા મળી રહ્યો છે. ગઈકાલથી જ ગેસના બોટલોનું વિતરણ શરૂ કરી દેવામાં આવતા ઉદ્યોગપતિઓ અને શ્રમિકોમાં હકારાત્મક ઉર્જાનો સંચાર થયો છે.

ગેસ વિતરણની કામગીરી પૂરજોશમાં શરૂ

રાજ્ય સરકારના નિર્ણય બાદ તાત્કાલિક અસરથી ઇન્ડસ્ટ્રીને ગેસ બોટલ આપવાની શરૂઆત કરી દેવામાં આવી છે. ગઈકાલે જ 4 મોટી ગેસ કંપનીઓ દ્વારા અંદાજે 500 જેટલા ગેસના બોટલો ઇન્ડસ્ટ્રીને પૂરા પાડવામાં આવ્યા છે. આ સુવિધા માત્ર સુરત પૂરતી મર્યાદિત નથી, પરંતુ સુરત સહિત સમગ્ર દક્ષિણ ગુજરાતમાં આવેલી તમામ ઇન્ડસ્ટ્રીઝને તબક્કાવાર ગેસનો જથ્થો પૂરો પાડવામાં આવશે.

શ્રમિકોની ઘરવાપસી માટેની તૈયારીઓ

ઉદ્યોગો ફરી ધમધમતા થવાની આશા સાથે હવે શ્રમિકોને પણ પરત લાવવા માટેની વ્યવસ્થાઓ હાથ ધરવામાં આવી છે. ઉદ્યોગ જગતના અગ્રણીઓનું માનવું છે કે ગેસ પુરવઠો શરૂ થવાથી પ્રોડક્શન વધશે, જેનાથી શ્રમિકોને ફરી પોતાની રોજગારી મળી રહેશે. આંતરરાષ્ટ્રીય સ્તરે સીઝફાયરની જાહેરાત થતા વેપાર જગતમાં વિશ્વાસ વધ્યો છે, જેની સીધી અસર સુરતના કાપડ બજાર પર જોવા મળશે.

આ પણ વાંચો: Morbi: મોટાભેલા ગામે કામધંધા બાબતે ટોકતા પુત્રએ 85 વર્ષીય પિતાની કુહાડીના ઘા ઝીંકી હત્યા