સુરત શહેરમાં હાલ વિકાસલક્ષી કાર્યોની હારમાળા ચાલી રહી છે, પરંતુ તેની બીજી બાજુ શહેરીજનો ટ્રાફિકની ગંભીર સમસ્યાનો સામનો કરી રહ્યા છે. આ મુદ્દે સુરત મ્યુનિસિપલ કમિશનરે એક મહત્વનું નિવેદન આપતા સ્વીકાર્યું છે કે શહેરનો ઝડપી વસ્તી વધારો અને મેટ્રો રેલ પ્રોજેક્ટની કામગીરી અત્યારે વહીવટીતંત્ર માટે એક મોટો પડકાર બની રહી છે.
વસ્તી વધારો અને મેટ્રોની કામગીરી મુખ્ય કારણ
કમિશનરે જણાવ્યું હતું કે, સુરત એક એવું શહેર છે જ્યાં દર વર્ષે વસ્તીમાં મોટો ઉછાળો જોવા મળે છે. વધતી વસ્તીની સાથે વાહનોની સંખ્યામાં પણ ઉત્તરોત્તર વધારો થઈ રહ્યો છે. હાલમાં શહેરમાં મેટ્રો રેલ પ્રોજેક્ટનું કામ પૂરજોશમાં ચાલી રહ્યું હોવાથી ઘણા મુખ્ય માર્ગો સાંકડા બન્યા છે અથવા ડાયવર્ઝન આપવામાં આવ્યા છે, જેના કારણે ટ્રાફિકની સમસ્યા વધુ જટિલ બની છે.
