રંગોના પર્વ ધુળેટીની સમગ્ર રાજ્યમાં ધામધૂમથી ઉજવણી કરવામાં આવી રહી છે, ત્યારે સુરેન્દ્રનગર જિલ્લા પોલીસ હેડક્વાર્ટર ખાતે પણ અનેરો ઉત્સાહ જોવા મળ્યો હતો. પોલીસ પરિવાર દ્વારા આયોજિત આ કાર્યક્રમમાં જિલ્લા પોલીસ વડા પ્રેમસુખ ડેલું, DYSP સહિતના ઉચ્ચ અધિકારીઓ અને મોટી સંખ્યામાં પોલીસ જવાનો જોડાયા હતા.
ગુંજી ઉઠ્યા ગરબા અને ડીજેના સૂર
પોલીસ સ્ટેશનો અને ફિલ્ડ પર સતત ફરજ બજાવતા પોલીસ જવાનો માટે આ દિવસ તણાવમુક્ત બનીને આનંદ માણવાનો હતો. હેડક્વાર્ટર ખાતે ડીજેના તાલે પોલીસ જવાનો ગરબા અને બોલીવુડના ગીતો પર મન મૂકીને નાચ્યા હતા. SP પ્રેમસુખ ડેલુ પણ પોતાની શિસ્તબદ્ધ છાપ છોડીને એક સામાન્ય નાગરિકની જેમ જવાનો સાથે ગરબે ઘૂમ્યા હતા, જે જોઈને સૌ કોઈ મંત્રમુગ્ધ થઈ ગયા હતા.