તાપી જિલ્લાના નિઝર અને કુકરમુંડા તાલુકામાંથી પસાર થતી તાપી નદીનો પટ ઉચ્ચ ગુણવત્તાવાળી રેતી માટે જાણીતો છે. આ કુદરતી સંપત્તિ પર લાંબા સમયથી ખનીજ માફિયાઓએ મનસ્વી રીતે કબજો જમાવી રાખ્યો હોવાની ફરિયાદો ગાંધીનગર સુધી પહોંચી હતી. સ્થાનિક સ્તરે બાતમી લીક થઈ જતી હોવાના કારણે આ વખતે સુરત ફ્લાઈંગ સ્ક્વોડની સ્પેશિયલ ટીમને ઓપરેશનની જવાબદારી સોંપાઈ હતી. સુરત ખાણ વિભાગ અને તાપી ભૂસ્તર વિભાગની સંયુક્ત ટીમે ગઈકાલે મોડી રાત્રે ગુપ્ત આયોજન કરીને નિઝરના સુલવાડા ગામની સીમમાં રેડ કરી હતી.
નાવડી અને હિટાચી મશીન વડે થતું હતું મોટું સ્કેમ
અધિકારીઓ જ્યારે રાત્રે 1 થી 2 વાગ્યાની આસપાસ ખાનગી વાહનોમાં સુલવાડા ગામે નદીના પટ પર પહોંચ્યા ત્યારે ત્યાં દ્રશ્યો જોઈને ચોંકી ગયા હતા. રાત્રિના સમયે સરકારી નિયમો વિરૂદ્ધ લાઈટો ગોઠવીને હિટાચી મશીન વડે નદીમાંથી રેતી ખોદવામાં આવી રહી હતી. એટલું જ નહીં, નદીના ઊંડા પાણીમાંથી રેતી સક્શન કરવા માટે એક મોટી નાવડી (બોટ) પણ ઓપરેટ કરવામાં આવી રહી હતી. ત્યાં હાજર મજૂરો અને ચાલકોમાં સરકારી ગાડીઓ જોતા જ દોડધામ મચી ગઈ હતી.
