દક્ષિણ ગુજરાતમાં ભૂકંપના નાના-મોટા આંચકા આવવાનો સિલસિલો સમયાંતરે ચાલુ રહે છે, ત્યારે આજે વહેલી સવારે તાપી જિલ્લાના ઉકાઈ અને તેની આસપાસના વિસ્તારોમાં ભૂકંપનો આંચકો અનુભવાયો છે. ગાંધીનગર સ્થિત ઇન્સ્ટિટ્યૂટ ઓફ સિસ્મોલોજીકલ રિસર્ચ (ISR) ના આંકડા અનુસાર, રિક્ટર સ્કેલ પર આ આંચકાની તીવ્રતા 2.7 નોંધાઈ હતી. વહેલી સવારે ૫:૦૧ વાગ્યે જ્યારે મોટાભાગના લોકો નિદ્રાધીન હતા, ત્યારે અચાનક ધરતી ધ્રુજી ઉઠતાં લોકો ભયના માર્યા જાગી ગયા હતા અને કેટલાક પરિવારો ઘરની બહાર ખુલ્લા મેદાનમાં દોડી આવ્યા હતા.
ઉકાઈથી 32 કિમી દૂર એપીસેન્ટર
ભૂકંપ વિજ્ઞાન કેન્દ્રના જણાવ્યા મુજબ, આ હળવા ભૂકંપનું કેન્દ્રબિંદુ ઉકાઈથી આશરે 32 કિલોમીટર દૂર જમીનની અંદર નોંધાયું હતું. 2.7 ની તીવ્રતાનો આંચકો ખૂબ જ નાનો ગણાય છે, જેના કારણે સામાન્ય રીતે પાકા મકાનો કે ઇન્ફ્રાસ્ટ્રક્ચરને કોઈ નુકસાન થતું નથી. જોકે, ગ્રામીણ વિસ્તારોમાં નળિયાવાળા અને કાચા મકાનોમાં રહેતા લોકોને ધ્રુજારીનો સ્પષ્ટ અહેસાસ થયો હતો. આસપાસના સોનગઢ અને વ્યારાના કેટલાક ભાગોમાં પણ આ હળવી ધ્રુજારી અનુભવાઈ હોવાના અહેવાલ છે.
