બનાસકાંઠાના સરહદી વિસ્તારમાં આવેલા થરાદ-સાંચોર હાઈવે પર પૂરઝડપે દોડતી એક કારે અકસ્માત સર્જ્યો હતો. રાજસ્થાન તરફથી આવી રહેલી આ કાર એટલી બેકાબૂ બની હતી કે તેણે હાઈવેની સુરક્ષા માટે રાખવામાં આવેલી લોખંડી જાળીઓ તોડી નાખી હતી. આ ઘટનામાં કારમાં સવાર બે વ્યક્તિઓને ઈજાઓ પહોંચી છે.
થરાદ - સાંચોર હાઈવે પર અકસ્માત
મળતી માહિતી મુજબ, કારચાલક પૂરઝડપે કાર હંકારી રહ્યો હતો ત્યારે સ્ટેયરિંગ પરથી કાબૂ ગુમાવતા કાર સીધી હાઈવેની જાળીમાં ઘૂસી ગઈ હતી. અકસ્માતનો અવાજ એટલો જોરદાર હતો કે આસપાસના લોકોના ટોળેટોળાં ઘટનાસ્થળે ઉમટી પડ્યા હતા. સદનસીબે આ અકસ્માતમાં કોઈ જાનહાનિ થઈ નથી, પરંતુ કારમાં સવાર બે લોકોને ઈજા પહોંચતા તેમને તાત્કાલિક સારવાર અર્થે નજીકની હોસ્પિટલ ખસેડવામાં આવ્યા છે.
