બનાસકાંઠા જિલ્લાના થરાદ તાલુકામાંથી આગની એક ચિંતાજનક ઘટના સામે આવી છે. થરાદના જમડા ગામ પાસેથી પસાર થતી નર્મદા મુખ્ય કેનાલ પાસે આવેલી બાવળની ઝાડીઓમાં અચાનક જ વિકરાળ આગ ભભૂકી ઉઠી હતી. જોતજોતામાં આગની જ્વાળાઓ અને કાળા ડીબાંગ ધુમાડાના ગોટેગોટા આકાશમાં દૂર-દૂર સુધી દેખાવા લાગ્યા હતા, જેને પગલે કેનાલ આસપાસના વિસ્તારો અને સ્થાનિક ગ્રામજનોમાં ભારે ભય અને અફરાતફરીનો માહોલ સર્જાયો હતો.
બાવળની ઝાડીઓમાં શોર્ટ સર્કિટના કારણે લાગી આગ
પ્રાથમિક માહિતી અનુસાર, નર્મદા કેનાલની બાજુમાં આવેલી બાવળની ગીચ ઝાડીઓ પરથી પસાર થતા વીજ લાઈનના તારમાં અચાનક શોર્ટ સર્કિટ થયું હતું. શોર્ટ સર્કિટના તણખા ઝાડીઓમાં પડતાં જ ઉનાળાની સૂકી ઋતુ અને પવનના કારણે આગે અત્યંત વિકરાળ સ્વરૂપ ધારણ કરી લીધું હતું. આગચંપીની આ ઘટના અંગે સ્થાનિક લોકોએ સમયસૂચકતા વાપરીને તાત્કાલિક થરાદ ફાયર બ્રિગેડની ટીમને જાણ કરી હતી.