વડોદરા જિલ્લાના કરજણ તાલુકાના નારેશ્વર રોડ પર આજે એક હૃદયદ્રાવક અકસ્માત સર્જાયો છે. નર્મદા નદીના કિનારે લીજ વિસ્તારમાં જવાના રસ્તે એક બાઈક સ્લીપ થઈ જતાં પાછળથી આવી રહેલા હાઈવા ડમ્પરના ટાયર નીચે કચડાઈ જવાથી 2 વર્ષની માસૂમ બાળકી અને એક યુવકનું કમકમાટીભર્યું મોત નીપજ્યું છે.
નાસ્તો લઈને પરત ફરતા સમયે નડ્યો કાળ
મળતી પ્રાથમિક વિગતો મુજબ, ભાઠા વિસ્તારમાં રહેતો એક ઈસમ પોતાની બાઈક પર 2 વર્ષની બાળકી અને અન્ય એક શખ્સ સાથે નારેશ્વર ખાતે નાસ્તો લેવા માટે આવ્યો હતો. નાસ્તો લઈને જ્યારે તેઓ પરત ફરી રહ્યા હતા, ત્યારે કાચા રસ્તાના ચીલામાં અચાનક બાઈક સ્લીપ થઈ ગયું હતું. બાઈક સવારો નીચે પટકાયા તે જ સમયે પાછળથી પુરપાટ ઝડપે આવી રહેલું હાઈવા ડમ્પર તેમના પર ફરી વળ્યું હતું.