વડોદરાના સૌથી વ્યસ્ત ગણાતા સેન્ટ્રલ બસ સ્ટેશન પર આજે એક મોટી દુર્ઘટના સર્જાઈ છે. બસ સ્ટેશનના ઉપરના ભાગનું લોખંડનું તોતિંગ સ્ટ્રક્ચર (શેડ) અચાનક ધરાશાયી થઈને નીચે ઉભેલા રાહદારીઓ પર ખાબક્યું હતું. આ ગંભીર અકસ્માતમાં એક વ્યક્તિનું લોખંડના કાટમાળ નીચે દબાઈ જવાથી ઘટનાસ્થળે જ મોત નીપજ્યું છે, જ્યારે અન્ય એક વ્યક્તિ ઈજાગ્રસ્ત થઈ હોવાના અહેવાલ છે.
વડોદરા સેન્ટ્રલ બસ સ્ટેશન પર દુર્ઘટના
દુર્ઘટનાને પગલે બસ સ્ટેશન પર ભારે અફરાતફરી મચી ગઈ હતી. બનાવની જાણ થતા જ ફાયર બ્રિગેડ અને પોલીસનો કાફલો સ્થળ પર દોડી આવ્યો હતો. ફાયર ટીમે તાત્કાલિક કાટમાળ હટાવવાની કામગીરી શરૂ કરી હતી. સદનસીબે જે સમયે આ સ્ટ્રક્ચર પડ્યું તે સમયે ત્યાં કોઈ બસની અવરજવર ન હોવાથી મોટી જાનહાનિ ટળી હતી, નહિતર મોટી સંખ્યામાં મુસાફરો ભોગ બની શક્યા હોત.