વડોદરામાં મોડી રાત્રે વાહનોની સ્પીડ મર્યાદા અને ટ્રાફિક નિયમોના લીરેલીરા ઉડાવતો એક ગમખ્વાર અકસ્માત સામે આવ્યો છે. શહેરના વ્યસ્ત ગણાતા અક્ષર ચોક નજીક પેટ્રોલ પંપ સામે એક કાર ચાલકે વાહન પરથી કાબૂ ગુમાવતા કાર સીધી ડિવાઇડર પર ચડી ગઈ હતી. અકસ્માત એટલો પ્રચંડ હતો કે કાર ઝાડ અને લોખંડના થાંભલા સાથે અથડાઈને ફસાઈ ગઈ હતી.
ચાલક નશામાં હોવાની આશંકા સાથે ફરાર
જેપી રોડ પોલીસ સ્ટેશનની હદમાં બનેલી આ ઘટના બાદ આસપાસના લોકો એકઠા થઈ ગયા હતા. જોકે, અકસ્માત સર્જાયાના ગણતરીના સમયમાં જ કાર ચાલક પોતાના વાહનને ઘટનાસ્થળે જ મૂકીને અંધારાનો લાભ ઉઠાવી ફરાર થઈ ગયો હતો. પ્રત્યક્ષદર્શીઓ અને પોલીસના પ્રાથમિક અનુમાન મુજબ, કારની સ્પીડ ખૂબ જ વધારે હતી અને ડ્રાઈવર નશાની હાલતમાં હોવાના કારણે આ અકસ્માત સર્જાયો હોઈ શકે છે.