વડોદરા-ભરૂચ નેશનલ હાઈવે 48 પર આજે એક દર્દનાક અકસ્માત સર્જાયો હતો. કરજણ પાસેથી પસાર થઈ રહેલી એક કાર આગળ જઈ રહેલી ટ્રક સાથે ધડાકાભેર અથડાતા ચકચાર મચી ગઈ હતી. આ અકસ્માતમાં કારમાં સવાર એક વ્યક્તિનું ઘટનાસ્થળે જ કમકમાટીભર્યું મોત નીપજ્યું છે, જ્યારે અન્ય ત્રણ મુસાફરોને ગંભીર ઈજાઓ પહોંચી છે.
કરજણ NH 48 પર અકસ્માતમાં 1નું મોત
પ્રાપ્ત વિગતો અનુસાર, એક કાર વડોદરાથી ભરૂચ તરફ જઈ રહી હતી ત્યારે કરજણ નજીક નેશનલ હાઈવે પર કારના ચાલકે સ્ટેયરિંગ પરથી કાબૂ ગુમાવતા કાર ટ્રકની પાછળના ભાગે ઘૂસી ગઈ હતી. ટક્કર એટલી જોરદાર હતી કે કારના કુરચેકુરચા ઉડી ગયા હતા. અકસ્માતને પગલે હાઈવે પર ટ્રાફિક જામના દ્રશ્યો સર્જાયા હતા.