વડોદરાના નેશનલ હાઈવે-48 પર એક હૃદયદ્રાવક અકસ્માતની ઘટના સામે આવી છે. આજવા અને વાઘોડિયા ચોકડી વચ્ચે કારચાલકે હાઈવે ઓળંગી રહેલા દાદી અને પૌત્રને જોરદાર ટક્કર મારતા બંનેનાં ઘટનાસ્થળે જ મોત નીપજ્યાં છે. આ અકસ્માતને પગલે હાઈવે પર લોકોના ટોળેટોળાં ઉમટી પડ્યા હતા અને વાતાવરણ ગમગીન બની ગયું હતું.
વડોદરામાં અકસ્માતમાં દાદી અને પૌત્રના મોત
મળતી માહિતી મુજબ, હરખાબેન સોલંકી અને તેમનો પૌત્ર વનરાજ સોલંકી આજે આજવા-વાઘોડિયા ચોકડી વચ્ચેના હાઈવે પરથી રસ્તો ઓળંગી રહ્યા હતા. આ દરમિયાન પુરપાટ ઝડપે આવી રહેલી એક કારના ચાલકે સ્ટીયરિંગ પરથી કાબૂ ગુમાવ્યો હતો અને દાદી-પૌત્રને અડફેટે લીધા હતા. ટક્કર એટલી ભીષણ હતી કે બંનેના શરીર પર ગંભીર ઈજાઓ પહોંચતા તેમણે ઘટનાસ્થળે જ દમ તોડી દીધો હતો.
