વડોદરા જિલ્લાના સાવલી તાલુકાના મંજૂસર જીઆઈડીસી (GIDC) વિસ્તારમાં આજે એક કંપનીમાં ભીષણ આગ લાગવાની ઘટના સામે આવી છે. મંજૂસર ચોકડી પાસે આવેલી આ કંપનીમાં લાગેલી આગ એટલી વિકરાળ હતી કે તેના ધુમાડાના ગોટેગોટા અને જ્વાળાઓ પાંચ કિલોમીટર દૂરથી પણ જોઈ શકાતા હતા.
આગનું વિકરાળ સ્વરૂપ
મળતી માહિતી મુજબ, કંપનીના પરિસરમાં અચાનક આગ ફાટી નીકળી હતી. કંપનીમાં રહેલા જ્વલનશીલ પદાર્થો કે કેમિકલને કારણે આગે જોતજોતામાં રૌદ્ર સ્વરૂપ ધારણ કરી લીધું હતું. આગની તીવ્રતા એટલી વધુ હતી કે આસપાસની અન્ય કંપનીઓ પર પણ જોખમ ઊભું થયું હતું, જેના પગલે તકેદારીના ભાગરૂપે આસપાસનો વિસ્તાર ખાલી કરાવવાની ફરજ પડી હતી.