વડાપ્રધાન નરેન્દ્ર મોદીને સરદારધામ દ્વારા અત્યંત પ્રતિષ્ઠિત 'સરદાર ગૌરવ રત્ન એવોર્ડ' એનાયત કરવાનો નિર્ણય લેવામાં આવ્યો છે. આ એવોર્ડ આપવા પાછળનો હેતુ રાષ્ટ્રના વિકાસ અને સમાજના ઉત્થાનમાં તેમના યોગદાનને બિરદાવવાનો છે. સરદારધામના ઉપપ્રમુખ જશવંત પટેલે આ એવોર્ડની બનાવટ અને તેની વિશેષતાઓ અંગે સંદેશ ન્યૂઝ સાથે ખાસ વાતચીત કરી હતી.
અમદાવાદમાં તૈયાર થયો છે એવોર્ડ
જશવંત પટેલે જણાવ્યું હતું કે, આ એવોર્ડ સંપૂર્ણપણે અમદાવાદમાં જ તૈયાર કરવામાં આવ્યો છે. તેને બનાવવામાં ખાસ નિષ્ણાત કારીગરોની મદદ લેવામાં આવી છે. આ એવોર્ડ માત્ર એક સન્માન નથી, પરંતુ પાટીદાર સમાજની લાગણીઓ અને કલાનું અદભૂત મિશ્રણ છે. સરદારધામના સભ્યો વડાપ્રધાનને આ સન્માન આપતા ગર્વની લાગણી અનુભવે છે.
160 ગ્રામ સોનાનો ઉપયોગ
એવોર્ડની ભવ્યતાનો અંદાજ એ વાત પરથી લગાવી શકાય છે કે તેને બનાવવામાં 160 ગ્રામ સોનાનો ઉપયોગ કરવામાં આવ્યો છે. આ એવોર્ડને કિંમતી ધાતુથી મઢવામાં આવ્યો છે જેથી તેની ગરિમા જળવાઈ રહે. જશવંત પટેલના જણાવ્યા મુજબ, આ એવોર્ડની ડિઝાઇન એટલી ખાસ છે કે તેને અગાઉથી જ રજીસ્ટર કરાવી દેવામાં આવી છે. રજીસ્ટ્રેશનનો અર્થ એ છે કે ભવિષ્યમાં કોઈ પણ સંસ્થા કે વ્યક્તિ આ પ્રકારની ડિઝાઇનનો એવોર્ડ બનાવી શકશે નહીં.
સંગઠનમાં ઉત્સાહનો માહોલ
સરદારધામ અને સમગ્ર પાટીદાર સમાજમાં આ સમાચારને લઈને ખૂબ જ ખુશી છે. આગામી સમયમાં આ એવોર્ડ અન્ય કઈ વિભૂતિઓને આપવો, તે માટેની પસંદગી એક ખાસ કમિટી દ્વારા કરવામાં આવશે. હાલમાં તો આખું સરદારધામ વડાપ્રધાનના સન્માન સમારોહની તૈયારીઓમાં જોતરાયેલું છે. વડાપ્રધાનને અપાનારા આ એવોર્ડથી પાટીદાર સમાજની એકતા અને દેશભક્તિના દર્શન થાય છે.